Dumbraziuns

Survesta dil moviment dalla populaziun tuatschina

18avel tschentaner

19avel tschentaner

20 e 21avel tschentaner

Naven da 1850 ein las indicaziuns digl Uffeci federal da statistica e dalla canzlia communala igl onn 2006, 2011 e 2015.

Gion Giusep Derungs (staus ell’America); Maria Derungs, Rosa Derungs, Gion Michel Derungs-Jacomet (staus ell’America); Placi Derungs, Onna Maria Derungs-Jacomet (stada ell’America); Casper Derungs
(Davart ils Derungs ell’America mira „Emigraziun ell’America“ da Tarcisi Hendry, pag. 369)

Il Gion Mihel e Gion Giusep Derungs ein cuort suenter l’entschatta dil 20avel tschentaner, numnadamein 1908, returnai ella patria. Els eran pulitamein spossai e surtut il Gion Mihel haveva da sbatter culla sanadad, oravontut perquei ch’el buevi en tutta calira latg freid. Ils geniturs fuvan morts, il bab 1896 e la mumma 1903. Igl ei da supponer ch’els hagien avon che vegnir anora vendiu tut lur fatg a Badus. En Tujetsch ha ei adina giu num ch’ils Derungs hagien giu gronda fortuna ell’America. Ins tschintschava ch’ils Derungs seigien daventai milliunaris el Badus american. Suenter gronda fortuna ein pia il Gion Giusep e Gion Michel turnai en Tujetsch.
Igl ei denton buca aschi segir ch’ils dus frars vevien decidiu da vegnir definitivamein anora. Forsa levan els era mo visitar la veglia patria e lu puspei turnar anen, fuvan gie il rest dils fargliuns a Badus. A Rueras, meglier detg en Tujetsch, vevan els negin possess pli, sulettamein parents ed enconuschents. Tenor la dumbraziun da 1897 a Badus vevan Derungs Brothers duas farmas, ina damaneivel dalla baselgia e l’autra treis miglias el nord. Ils daners per la vendita dallas farmas ch’els possedevan ensemen a Badus ein arrivai per 1912 a Sedrun e quei promova quella supposiziun.
Forsa ha lu il suandont schabetg midau il meini dil Gion Mihel. Da retuorn sil bastiment ha el fatg enconuschientscha cun la giuvna Onna Maria Jacomet che vegneva era dall’America. Ella era emigrada 1903 cun sia sora Rosa Martina. Ei ha giu num che las duas feglias vevien stuiu ir ell’America e fadigiar, damai che lur bab, il Placi Sigisbert Jacomet (1846–1928), fuvi vegnius en deivets ch’el vevi fatg sco marcadont da stiarls allas fieras da Ligiaun.
La Rosa Martina (1882–1964) ha lu maridau 1913 il Duri Giusep Monn (1883–1972), il «Pepi Madleiner» ed els ein lu turnai 1913 anavos ell’America.